🟢Qishloq xo‘jaligida sabzavotchilikni rivojlantirish, sifatli urug‘ yetishtirib, hosilga erishish, shuningdek, ekinlarni standartlar asosida parvarishlab ijobiy natijadorlikni egallash masalasi bugunning kun tartibidagi muhim masalalaridan biridir.
🔝Buning natijasi o‘laroq, Qishloq xo‘jaligi vazirligi huzuridagi Qishloq xo‘jaligida bilim va innovatsiyalar milliy markazi direktori Shuhrat Otajonov Janubiy Koreya Respublikasi Xalqaro bog‘dorchilik instituti Shimoliy qishloq xo‘jaligi ilmiy-tadqiqot markazi direktori Myeongwhoon Seo bilan uchrashdi.
💬Samimiy ruhda boshlangan muloqotda dastavval har ikki tomonning o‘zaro hamkorligida amalga oshirilgan bir qator loyihalar ravnaq topayotgani, bunday yondashuv yangi kelishuvlarning kelgusidagi istiqboliga ijobiy ta’sir etishi borasida iliq fikrlar bildirildi.
✅Shuningdek, Koreya Respublikasining Korea Smart Farm R&D Foundation tashkiloti tomonidan moliyalashtirilayotgan "Development of Northern-Type Smart Farm Package Model for Export" loyihasi doirasida Qishloq xo‘jaligi vazirligi tizimidagi Sabzavot, poliz ekinlari va kartoshkachilik ilmiy-tadqiqot instituti hududida issiqxona majmuasini qurish loyihasi ko‘rib chiqildi.
📌Shu bilan birga, O‘zbekistonda mahalliy kartoshka urug‘chilik tizimini yaratish bo‘yicha fikrlar tinglandi. Aytish mumkinki, yurtimizda xorijdan import qilinayotgan kartoshka urug‘ining sifat holatini, virusdan holi ekanligini aniqlash va tasdiqlash imkoniyat yo‘q. Kelishuvga ko‘ra, endilikda o‘zbekistonlik mutaxassislar Koreya respublikasiga borib, kartoshka urug‘larini sifatini aniqlash texnologiyasi bo‘yicha malaka oshirish imkoniga ega bo‘ladi.
💬Qolaversa, kuz oylarida koreyalik tajribali mutaxassislarni O‘zbekistonga taklif etgan holda, hamkorlikda seminar tashkil qilish ko‘zda tutilgan. Bunda sabzavot va poliz ekinlarini sifatli yetishtirish, kartoshka urug‘larida virus mavjud yoki yo‘qligini aniqlash bo‘yicha Koreya tajribasi keng tanishtiriladi.
🔗Yig‘ilish yakunida sabzavot ekinlarining duragay urug‘chiligini tashkil etish agrotexnikasi borasida o‘zaro tajriba almashish masalasi ko‘rib chiqildi va bu kabi amalga oshirilayotgan loyihalar kelgusida ikki tomonning manfaatiga uyg‘un bo‘lgan natijadorlikka asos bo‘lishi aytib o‘tildi.
